Захирлын мэндчилгээ


      Монгол Улсын Боловсролын их сургууль (МУБИС) нь 65 жилийн түүхтэй Үндэсний хэмжээний багшлах боловсон хүчинг бэлтгэж ирсэн төрийн өмчит тэргүүлэх их сургуулиудын нэг юм. 1951 онд анх Багшийн институт нэртэйгээр дээд боловсролтой төрөл бүрийн мэргэжлийн багш нарыг  бэлтгэх дээд сургууль болж байгуулагдснаас хойш өнгөрсөн түүхэн цаг хугацаанд 1957 оноос Улсын Багшийн дээд сургууль (УБДС), 1991 оноос Улсын Багшийн Их сургууль (УБИС), 2004 оноос Монгол Улсын Боловсролын их сургууль (МУБИС) нэртэй нийгмийн хөгжлийн эрэлт хэрэгцээнд нийцүүлэн Боловсролын салбарт төрөл бүрийн багш, мэргэжилтнийг бэлтгэсээр байна. 

     Өнөөдөр тус их сургууль нь өргөжин тэлж боловсролын салбарын шинэчлэлийг гүнзгийрүүлэн чанартай багшлах боловсон хүчин, мэргэжилтэн бэлтгэхийн төлөө, Олон улсын жишигт нийцсэн сургалт, эрдэм шинжилгээ, судалгаа- үйлдвэрлэл, хамтын ажиллагааг хөгжүүлэхийн төлөө бүхий л талаар чармайн ажиллаж байна.

      МУБИС нь бакалавр, магистр, докторын сургалтыг олон хэлбэрээр зохион байгуулж, 14000 орчим суралцагчтай, 1000-аад эрдэмтэн багш, ажилтан, албан хаагчидтайгаар  хичээлийн болон оюутны 20 гаруй байр, сургалт судалгааны 10-аад төв, мэдээллээр төрөлжсөн электрон бааз бүхий 196976 ширхэг номын фондтой, 1000-аад  уншигчийн суудал бүхий тохилог номын сангууд, 40 гаруй лаборатори, 500-аад анги танхим, 10 гаруй орчин үеийн спорт, урлаг болоод сургалтын заал танхимтай оюутан суралцагчид болон эрдэмтэн багш нартаа суралцаж, ажиллах таатай орчин бүрдүүлсэн.

      Багш боловсролын шинэчлэлийг гүнзгийрүүлэн боловсролын чанарыг дээшүүлэхийн тулд бүтцийн өөрчлөлт хийж, сургалтын хөтөлбөр, төлөвлөгөөг нийгмийн хэрэгцээ шаардлага, олон улсын жишигт нийцүүлэн иж бүрэн шинэчлэн хэрэгжүүлж эхлээд байна. Мөн сургалтын цахим орчинг бүрдүүлэн сургалт, эрдэм шинжилгээний 10-аад удирдлага мэдээллийн системийг нэвтрүүлэв. 

        Багш боловсролын чанарыг дээшлүүлэхийн тулд элсэгчид болон төгсөгчдийн чанарт анхаарч, оюутан суралцагчидаа төрөл бүрийн тэтгэлэгт хөтөлбөрт хамруулж, багшлах дадлагын чанарыг сайжруулж, тэтгэлэгтэйгээр хөдөө орон нутагт оюутны багшлах дадлагыг гүйцэтгүүлж байна.

         Засгийн газраас хэрэгжүүлж буй боловсролын чанарын шинэчлэлийн цөмд багш бэлтгэх сургуулиуд байгаа нь багшийн тоонд бус чанарт эрс өөрчлөлт хийх нийгмийн хэрэгцээ, шаардлагаас үүдэлтэй юм. Монголчуудын шавь сургуулиар багш бэлтгэж ирсэн мянган мянган жилийн түүхэн уламжлалыг залгамжлан яваа МУБИС нь багшлах хүн хүчний нөөцийг бүрдүүлэх, чанаржуулахад жинтэй хувь нэмэр оруулсаар ирсэн үндэсний багш бэлтгэх сургууль юм.

     Бид олон улсын болон үндэсний төвшинд бусад сургууль, эрдэм шинжилгээний байгууллагуудтай хамтран ажиллах нээлттэй бодлого баримталж ирэв. Ийнхүү  Өнгөрсөн багагүй хугацаанд МУБИС-ийн гадаад хамтын ажиллагаа эрс өргөжин тэлж өнөөдрийн байдлаар Азийн 60-иад орон, Европын 17 орон, Латин Америкийн 5 орны нийт 90 гаруй их, дээд сургуулиудтай хамтын ажиллагааны гэрээ байгуулан олон талт үйл ажиллагааг өргөжүүлэн хөгжүүлж байна.

       Мөн багш, оюутны эрдэм шинжилгээ- судалгааны ажлыг дэмжих, чанаржуулах зорилгоор гадаадын болон дотоодын мөн өөрийн санхүүжилтээр олон төслийг хэрэгжүүлж эхэлсэн  нь бодит үр дүнгээ өгч байгаа томоохон үйл ажиллагааны нэг болоод байгаа юм. Тухайлбал, өнөөдөр Азийн Хөгжлийн Банкнаас “Дээд боловсролын шинэчлэлийн төсөл”-ийн хүрээнд хэрэгжиж буй “Оюутны санаачлагыг дэмжих” 10 төсөл, МУБИС-ийн санхүүжилтээр хэрэгжиж буй багш нарын эрдэм шинжилгээ, судалгааны ажлыг дэмжих, инновацийн 11 төслийг нэрлэж болох юм.

      Ингээд Монголын багш боловсролын үе үеийн түүхийг бүтээлцэж ирсэн ахмад үеийнхэн болон эрдэмтэн багш нар бидний бахархал болсон манай их сургуулийн үүд хаалга өсвөр үеийнхэн, залуучууд та бүхний өмнө  үргэлж нээлттэй байх болно гэдгийг илэрхийлэхэд таатай байна.

Эрдэм номын ариун үйлс үргэлж дэлгэрч байхын ерөөлийг дэвшүүлье.

МУБИС-ийн захирлын үүрэг гүйцэтгэгч доктор Д.Мандах